டொனால்ட் ட்ரம்பின் ரஷ்ய ஆதரவு நிலைப்பாடும் ஐரோப்பாவின் பாதுகாப்பு நெருக்கடியும்

அமெரிக்க ஜனாதிபதி டொனால்ட் ட்ரம்ப் உலகிற்குத் தன்னை யார் என்று தொடர்ச்சியாக வெளிப்படுத்திக் கொண்டிருக்கும் போதிலும், மேற்குலக நாடுகள் இன்னமும் அந்த உண்மையை முழுமையாக ஏற்றுக்கொள்ளத் தயங்குவது துரதிர்ஷ்டவசமானதாகும். ரஷ்யா மற்றும் உக்ரைன் இடையிலான யுத்தத்தில் தான் ஒரு நடுநிலையான சமாதானத் தூதுவர் அல்ல என்பதையும், விளாடிமிர் புட்டினின் கூட்டாளி என்பதையும் ட்ரம்ப் தனது நகர்வுகள் மூலம் மீண்டும் ஒருமுறை பகிரங்கப்படுத்தியுள்ளார். 

2025 பெப்ரவரியில் வெள்ளை மாளிகையில் உக்ரைன் ஜனாதிபதி வொலோடிமிர் ஸெலென்ஸ்கியை அவமதிக்கும் வகையில் கருத்துக்களை வெளியிட்ட போதே ட்ரம்பின் வெளிநாட்டுக் கொள்கை எந்தத் திசையை நோக்கிப் பயணிக்கின்றது என்பது தெளிவாகியிருந்தது.

அண்மையில் உக்ரைன் இராணுவத்தின் ட்ரோன் தாக்குதல்களுக்கும் தலைநகரின் வான் பாதுகாப்புக்கும் மிக அத்தியாவசியமான 'ஸ்டார்ஷீல்ட்' (Starshield) செயற்கைக்கோள் கட்டமைப்பின் செயற்பாட்டு வேகத்தை மட்டுப்படுத்த வெள்ளை மாளிகை நேரடியாக உத்தரவிட்டுள்ளது. 

உக்ரைனின் தற்காப்பு பலத்தை நேரடியாகச் சீர்குலைக்கும் இந்த முடிவால் பொதுமக்களின் உயிரிழப்புகள் அதிகரிக்கும் என ஜனாதிபதி ஸெலென்ஸ்கி கடுமையாக எச்சரித்துள்ளார். இதுமட்டுமன்றி, உக்ரைனுக்கு வழங்கப்பட்டு வந்த முன்கூட்டிய உளவுத் தகவல்கள் நிறுத்தப்பட்டமை, மாஸ்கோ மீதான சர்வதேசத் தடைகளை மீறி ரஷ்யாவிடமிருந்து நான்கு பில்லியன் டொலர் பெறுமதியான டீசல் கொள்வனவு செய்ய எடுக்கப்பட்ட முடிவு, மற்றும் புட்டினுக்கு வழங்கப்பட்ட ஜீ20 அழைப்பு என்பன அமெரிக்காவின் இந்த பாரிய கொள்கை மாற்றத்தையே வெளிப்படுத்துகின்றன.

மேற்குலகக் கூட்டமைப்பின் மிக முக்கிய வல்லரசான அமெரிக்கா, அதன் பிரதான எதிரியான மொஸ்கோவுடன் இணக்கமாகச் செயல்படும் இத்தகைய சூழல் சர்வதேச ஒழுங்கிற்கே பாரிய அச்சுறுத்தலாகும். ஐரோப்பிய நாடுகளில் ரஷ்யாவின் நாசவேலைகள் அதிகரித்து வருவதாக புலனாய்வுத் தகவல்கள் எச்சரிக்கும் வேளையில், வாஷிங்டன் பக்கச்சார்பாக விலகிச் செல்வது ஐரோப்பிய நாடுகளைத் தனித்து விடுகின்றது. அமெரிக்காவின் இடைக்காலத் தேர்தல்களில் மாற்றங்கள் நிகழ்ந்தாலும் கூட, இந்த அரசியல் போக்கு நிரந்தரமானது என்பதை பிரிட்டன் உள்ளிட்ட ஐரோப்பிய நட்பு நாடுகள் புரிந்துகொள்ள வேண்டும்.

அமெரிக்காவின் பாதுகாப்பு அல்லது தொழில்நுட்ப உதவிகளில் தங்கியிருப்பவர்களுக்கு எந்நேரமும் அந்த உதவிகள் துண்டிக்கப்படலாம் என்பதையே ஸ்டார்லிங்க் விவகாரம் நிரூபித்துள்ளது. ஆகவே, பிரிட்டனும் ஐரோப்பாவும் இனிவரும் காலங்களில் தங்களின் சொந்தப் படைகள் மற்றும் உள்நாட்டு ஆயுத பலத்தின் மூலமே தற்காப்பை உறுதிப்படுத்திக்கொள்ள வேண்டிய கட்டாயத்திற்கு தள்ளப்பட்டுள்ளன. உலகளாவிய மோதல்களின் ஆபத்து தீவிரமடைந்துவரும் இந்நாளில், மாறிவரும் பூகோள அரசியல் சூழலுக்கு ஏற்ப ஐரோப்பிய நாடுகள் தமது பாதுகாப்புக்கான செலவீனங்களை அதிகரித்து, சுயசார்பான பாதுகாப்புப் பொறிமுறையை தாமதமின்றி உருவாக்க முன்வர வேண்டும்.