செயற்கைத் தோல் மூலம் ரோபோக்களுக்கு வலி உணர்வு: மனித நரம்பு மண்டலத்தைப் போலவே செயல்படும் இயந்திரங்கள்
ரோபோக்களுக்கு மனிதர்களைப் போல வலி, தொடுதல், வெப்பம் மற்றும் அழுத்தத்தை உடனடியாக உணரும் திறனை வழங்கும் புதிய செயற்கைத் தோல் தொழில்நுட்பத்தை ஹாங்காங் நகரப் பல்கலைக்கழக விஞ்ஞானிகள் உருவாக்கியுள்ளனர். ‘Neuromorphic E-Skin’ எனப் பெயரிடப்பட்ட இந்த மின்னணு தோல் (Electronic Skin), ரோபோக்களின் எதிர்காலத்தை முற்றிலும் மாற்றும் திறன் கொண்டதாகக் கருதப்படுகிறது.
இந்த மெல்லிய, நெகிழ்வான படலத்தில் ஆயிரக்கணக்கான நுண்சென்சார்கள் ஒருங்கிணைக்கப்பட்டுள்ளன. மனித நரம்புகள் மூளைக்குத் தகவல்களை அனுப்புவதைப் போலவே, இந்த சென்சார்கள் ரோபோவின் மையக் கணினிக்கு உடனுக்குடன் தொடுதல், அழுத்தம் மற்றும் வெப்பநிலைத் தகவல்களை அனுப்புகின்றன. இதன் மூலம், ஒரு ரோபோ முட்டையை உடைக்காமல் பிடிக்கவோ அல்லது இரும்புத் தூணைத் தூக்கவோ தேவையான அழுத்தத்தைச் சரியாக மதிப்பிட முடியும்.
இந்தத் தொழில்நுட்பம் குறிப்பாக மருத்துவத் துறையில் பெரும் தாக்கத்தை ஏற்படுத்தும். அறுவைசிகிச்சை ரோபோக்கள் திசுக்களின் மென்மையையும் அழுத்தத்தையும் துல்லியமாக உணர்ந்து, பாதுகாப்பான சிகிச்சையை வழங்க இது உதவும். அதேபோல, முதியோர் மற்றும் நோயாளிகளைப் பராமரிக்கும் ரோபோக்கள், மனிதர்களுக்கு மிகுந்த பாதுகாப்புடன் உதவ இச்செயற்கைத் தோல் முக்கிய பங்காற்றும்.
செயற்கை நுண்ணறிவு (AI) இத்தொழில்நுட்பத்ப்படு இணைக்கப்பட்டுள்ளது. வெறும் தொடுதலை உணர்வது மட்டுமல்லாமல், அது என்ன பொருள் என்பதையும் ரோபோ புரிந்துகொள்ள முடியும். உதாரணமாக, கண்ணை மூடிக்கொண்டு ஒரு பொருளைத் தொட்டாலும், அதன் மென்மை, வடிவம் மற்றும் மேற்பரப்புத் தன்மை ஆகியவற்றை வைத்து அது ஆப்பிளா அல்லது டென்னிஸ் பந்தா என்பதைக் கண்டறியும் திறன் உருவாக்கப்பட்டு வருகிறது.
இந்தத் துறையில் சிங்கப்பூர் தேசிய பல்கலைக்கழகம் (NUS), அமெரிக்காவின் ஸ்டான்போர்ட் பல்கலைக்கழகம் மற்றும் ஸ்காட்லாந்தின் கிளாஸ்கோ பல்கலைக்கழக ஆராய்ச்சியாளர்களும் குறிப்பிடத்தக்க முன்னேற்றங்களை அடைந்துள்ளனர். சில சோதனைகளில், மனித நரம்புகளை விடவே வேகமாகச் செயல்படும் செயற்கை நரம்பு மண்டலங்கள் உருவாக்கப்பட்டுள்ளன.
இந்த தொழில்நுட்பம் முழுமையாக வளர்ந்து நிலைத்தால், ரோபோக்கள் வெறும் இயந்திரங்களாக இருப்பதைத் தாண்டி, மனிதர்களுடன் நெருக்கமாகவும் பாதுகாப்பாகவும் இணைந்து செயல்படும் உதவியாளர்களாக மாறும் என எதிர்பார்க்கப்படுகிறது.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
