இந்த ஆண்டில் இதுவரை 33,572 டெங்கு நோயாளர்கள்; 19 உயிரிழப்புகள் பதிவு
இந்த ஆண்டின் இதுவரையான காலப்பகுதியில் நாட்டில் 33,572 டெங்கு நோயாளர்களும் 19 உயிரிழப்புகளும் பதிவாகியுள்ளதாக சுகாதார அதிகாரிகள் தெரிவித்துள்ளனர்.
கடந்த மே மாதத்தில் மாத்திரம் 8,321 டெங்கு நோயாளர்கள் அடையாளம் காணப்பட்டுள்ளனர் என சமூக சுகாதார விசேட வைத்திய நிபுணர் துஷானி தாபரேரா தெரிவித்தார். இது டெங்கு பரவல் தொடர்ந்து அதிகரித்து வருவதை எடுத்துக்காட்டுவதாக சுகாதாரத் துறையினர் எச்சரித்துள்ளனர்.
டெங்கு நோயாளர்களில் பெரும்பாலானோர் கொழும்பு, கம்பஹா மற்றும் குருநாகல் மாவட்டங்களில் இருந்து பதிவாகியுள்ளனர். குறிப்பாக, மொத்த நோயாளர்களில் சுமார் 50 சதவீதம் பேர் மேல் மாகாணத்தைச் சேர்ந்தவர்களாக உள்ளனர்.
மேலும், தற்போது நாட்டின் 72 சுகாதார மருத்துவ அதிகாரி (MOH) பிரிவுகள் டெங்கு பரவல் அபாயம் அதிகம் காணப்படும் பகுதிகளாக அடையாளம் காணப்பட்டுள்ளன. மேல் மாகாணத்தைத் தொடர்ந்து தென் மாகாணத்தில் 16 சதவீதமும், சப்ரகமுவ மாகாணத்தில் 9 சதவீதமும் டெங்கு நோயாளர்கள் பதிவாகியுள்ளனர்.
இந்த ஆண்டில் ஆறு மாதங்களே கடந்துள்ள நிலையில், டெங்கு நோயாளர்களின் எண்ணிக்கை 33 ஆயிரத்தைத் தாண்டியிருப்பது கவலைக்குரிய விடயமாகும் என சுகாதார அதிகாரிகள் சுட்டிக்காட்டுகின்றனர்.
இதனால், பொதுமக்கள் தங்கள் வீடுகள் மற்றும் சுற்றுப்புறங்களில் தேங்கிய நீரை அகற்றுதல், கொசு பெருகும் இடங்களை அழித்தல் மற்றும் டெங்கு தடுப்பு நடவடிக்கைகளில் தீவிரமாக ஈடுபடுதல் அவசியம் என சுகாதாரத் துறையினர் வலியுறுத்தியுள்ளனர்.
இந்த செய்தி உங்களுக்கு பிடித்திருந்ததா?
News21-ஐ கூகுள் நியூஸில் (Google News) பின்தொடர (Follow) செய்து, உடனுக்குடன் உண்மையான செய்திகளைப் பெறுங்கள்.
