உயர்ந்த வருமானம் பெறுபவர்களுக்கு மூன்று ஆண்டுகளில் பிரித்தானிய குடியுரிமை – புதிய குடிவரவு சீர்திருத்தம் அறிவிப்பு
பிரித்தானிய அரசு, உயர்ந்த வருமானம் பெறுபவர்கள் மற்றும் தொழில்முனைவோருக்கு மூன்று ஆண்டுகளில் நிரந்தர குடியுரிமை பெறும் புதிய வாய்ப்பை அறிமுகப்படுத்தியுள்ளது. இது கடந்த அரை நூற்றாண்டில் இடம்பெறாத மிகப்பெரிய குடிவரவு மாற்றமாகக் கருதப்படுகிறது.
உள்துறை அமைச்சகம் வெளியிட்ட தகவலின்படி, ஆண்டுக்கு £125,000-க்கும் அதிகமாக வருமானம் ஈட்டுபவர்கள் மூன்று ஆண்டுகள் தங்கிய பின் நிரந்தர குடியுரிமைக்காக விண்ணப்பிக்கலாம்.
இத்தகைய விண்ணப்பத்திற்கான நிபந்தனைகளில்: தகுந்த வேலைவாய்ப்பு நிலை, குற்றவியல் பின்னணி இல்லாமை, மேம்பட்ட ஆங்கிலத் திறன், அரசின் சலுகைகள் கோராமை ஆகியவை அடங்கும்.
தற்போதைய விதிப்படி, பெரும்பாலான புலம்பெயர்ந்தோர் ஐந்து ஆண்டுகள் கழித்தே நிரந்தர குடியுரிமைக்கு விண்ணப்பிக்க முடிகிறது. ஆனால், புதிய திட்டம் பொருளாதாரத்திற்கு பங்களிக்கும் திறமையான நபர்களுக்கு விரைவான வாய்ப்பை வழங்குகிறது.
சுகாதாரத் துறையில் பணிபுரியும் மருத்துவர்கள் மற்றும் செவிலியர்களுக்கு தொடர்ந்தும் ஐந்து ஆண்டுகள் கழித்து குடியுரிமை பெறும் வாய்ப்பு இருந்தாலும், குறைந்த சம்பளத்தில் பணிபுரியும் சுமார் 6 லட்சம் சுகாதார பணியாளர்கள் மற்றும் அவர்களின் குடும்பத்தினர் 15 ஆண்டுகள் வரை காத்திருக்க வேண்டிய சூழல் உருவாகிறது.
மேலும், சட்டவிரோதமாக தங்குபவர்கள் அல்லது விசா காலாவதியானவர்கள் அதிகபட்சம் 30 ஆண்டுகள் காத்திருக்க வேண்டிய சூழல் ஏற்படும்.
இந்த மாற்றங்கள், 2021 முதல் பிரித்தானியாவில் தங்கிவரும் 2 மில்லியன் புலம்பெயர்ந்தோருக்கு தாக்கத்தை ஏற்படுத்தும் என்று எதிர்பார்க்கப்படுகிறது. 2030ஆம் ஆண்டிற்குள் 1.6 மில்லியன் பேர் குடியுரிமைக்குத் தகுதி பெறுவார்கள் என கணிக்கப்படுகிறது.
புதிய கொள்கைகள், அதிக வருமானம் ஈட்டும் திறமையான நிபுணர்களை ஈர்த்துச் சூழலியல் மற்றும் பொருளாதார வளர்ச்சியை மேம்படுத்துவதே நோக்கமாக கொண்டுள்ளன.
எங்களின் சமீபத்திய செய்திகள், நிகழ்நேர முக்கிய செய்திகள் உடனுக்குடன் தெரிந்துகொள்ளுங்கள்.
