நாடு முழுவதும் பல உயிரிழப்பு சம்பவங்கள் பதிவாகின: பொலிஸ் அறிக்கை 

நியூஸ்21 (கொழும்பு): நாட்டின் பல்வேறு பகுதிகளில் நேற்றுப் புதன்கிழமை (15) வீதி விபத்துகள் மற்றும் நீரில் மூழ்குதல் உள்ளிட்ட பல துயர சம்பவங்கள் பதிவாகியுள்ளதாக பொலிஸார் அறிக்கை வெளியிட்டுள்ளனர். 

விபத்துகள்

வாரக்காபொல பகுதியில் மோட்டார் சைக்கிள் மற்றும் இராணுவ கெப் மோதியதில், கித்துல்கலவைச் சேர்ந்த 17 வயது சிறுமி உயிரிழந்தார். இந்த விபத்து, அலவ்வ-அம்பேபுஸ்ஸ வீதியில் இடம்பெற்றுள்ளதுடன், இதில் மூவர் காயமடைந்தனர்.

கித்துல்கலையில் இருந்து அவிசாவளை ஆடைத் தொழிற்சாலை நோக்கி ஊழியர்களை ஏற்றிச் சென்ற தனியார் பஸ், எதிர் திசையில் வந்த லொறியுடன் மோதி விபத்துக்குள்ளானதில் 20 பேர் காயமடைந்து கரவனெல்ல மற்றும் கித்துல்கலை வைத்தியசாலைகளில் அனுமதிக்கப்பட்டுள்ளனர்.

இந்த பஸ் விபத்தில் 51 வயது பெண் ஒருவர் உயிரிழந்தார். பஸ் சாரதி, நுவரெலியா பிரதேசத்தைச் சேர்ந்தவர் என்பதுடன், அவர் கைது செய்யப்பட்டுள்ளார்.

அதேவேளை, தொம்பகஹவெலவில், பஹத்தராவ பகுதியில் மோட்டார் சைக்கிள் ஒன்று டிப்பருடன் மோதியதில், மோட்டார் சைக்கிள் ஓட்டிச் சென்ற 31 வயது நபர் உயிரிழந்தார். டிப்பர் ஓட்டுநர் கைது செய்யப்பட்டுள்ளார்.

பொலன்னறுவையில், வெலிகந்த-ஒனேகம வீதியில் இரு மோட்டார் சைக்கிள்கள் மோதியதில் ஒருவர் உயிரிழந்தார்.

நீரில் மூழ்கி இறந்த சம்பவங்கள் 

நீரில் மூழ்கி இறந்த சம்பவங்கள் இரண்டையும் பொலிஸார் பதிவு செய்துள்ளனர்.

ஒன்று கல்பிட்டியில், காலி, கராபிட்டியைச் சேர்ந்த 57 வயது நபர் ஒருவர் தனது ஓய்வுப் பயணத்தின் போது நண்பர்களுடன் நீந்தும்போது நீரில் மூழ்கி இறந்தார்.

மற்றொன்று தங்காலை மீன்பிடி துறைமுகத்தில் இடம்பெற்ற ஒன்றுகூடலின் போது தண்ணீரில் விழுந்த 59 வயது உள்ளூர்வாசி ஒருவர் நீரில் மூழ்கி இறந்தார்.

மர்ம உயிரிழப்பு

மேலும், கொலன்னாவயைச் சேர்ந்த 36 வயது நபர் ஒருவர், லொறியில் மரங்களை ஏற்றும்போது ஒரு கட்டை மோதியதால் இறந்தார்.

அதேநேரத்தில் காணாமல் போனதாகக் கூறப்பட்ட 63 வயது நபரொருவர், மாவதகம பகுதியில் உள்ள ஒரு கிணற்றில் இறந்து கிடந்தார்.

திவுலபிட்டி, பலகல்லவில் உள்ள ஒரு தற்காலிக தங்கும் விடுதி அறைக்குள் 26 வயது இளைஞன் இறந்து கிடந்தார். அவரது இறப்புக்கான காரணம் இன்னும் கண்டறியப்படவில்லை.

இந்த அனைத்துச் சம்பவங்கள் குறித்தும் மேலதிக விசாரணைகள் நடைபெற்று வருவதாக பொலிஸார் தெரிவித்தனர்.